جیب تئلئفونون سسله نیر. مساژین وار یعنی! مساژی آچیب اوخویورسان. هویوخورسان! آذربایجانین ایگید اوغلو مهندیس غلامرضا امانی ایکی قارداشی ایله بیرگه ترافیک قضاسیندا حیاتلارینی ایتیرمیشلر. اینانمادیغین اوچون تعجیلی نئچه زنگ آچیرسان. بعضیسی خبرسیزدیر، شاشیریر. بعضیسی عینی مساژ آلدیغینی دئییر. بعضیسی شاییعه اولاجاغینی احتیمال ائدیر! و . . . کئشکه یالان اولایدی، اؤز – اؤزونه دئییرسن! آیری مساژلار واسیطه سییله ده خبری آلیرسان. گئت – گئده آجی خبره اینانیرسان. اوره یین گؤینه ییر. اوزولورسن. ترافیک قضاسی؟! بئینینه سورغولار جالانیر. جوابسیز سورغولار! امانی ایله کئچیردییین آنلارا دالیرسان. چکدییی حسرتلری، دؤزدویو آغریلاری سئیر ائدیرسن. یاپدیقلاری بیر سینئما پرده سی کیمی گؤزونون اؤنوندن کئچیر. نه ایسه آرتیق اونون جیسمی آرامیزدا دئییلدیر آما سؤزسوز کی، همیشه لیک اورکلریمیزده یاشایاجاق.

امانی مدنیتیمیزه، حرکتیمیزه، خالقیمیزا، یوردوموزا، وارلیغیمیزا، آذربایجانیمیزا ایچدن اینانان بیریسییدی. بیر چوخلاری کیمی ایناندی. اینانجی اوغرونا ایشکنجه لر چکدی. حبسلره دؤزدو. سیخینتیلار یاشادی. آما سینمادی، سینسیمه دی. بو سارسیلمازلیق و دؤنمزلیک بوگون بؤیوک بیر میلتچی کسیمی نین باریز صیفتیدیر. امانی ده بو صیفتی یوردونون تاریخیندن و قهرمانلاریندان اؤیره ندی. اؤلومونه دک سینمادی و اؤز حیاتی ایله اؤزللیکله گنج نسلیمیزه سارسیلمازلیق درسینی وئردی. کیمسه سانماسین او اؤلموش. بو میلت وار ایکن، یاشارکن اونو و اونا تای مینلرجه سینی یاشاداجاق. هر بیر لاییق میلت، میلی چالیشقان و موباریزلرینی اونوتمامالی اونلاری یاشاتمالیدیر بو آرادا آذربایجان همیشه بونو باشارمیش و بوندان سونرا دا باجاراجاقدیر. امانی و اونون قارداشلارینین دفن مراسیمینه - هاوا دورومونون گرگین اولدوغونا رغماً – و یاس تؤرن لرینه آذربایجانین هر طرفیندن قاتیلانلار اولدو. بو حادیثه اؤز اؤزلویونده میلی بیرلیییمیزی ده نوماییش ائتدیردی. حرکتیمیزی، مدنیتیمیزی، میلی اینسانلاریمیزی و اونلارین خاطیره سینی یاشادیب دیری ساخلاماق هامیمیزین میلی بورجودور. تانری غلامرضا بی امانی یه رحمت قیلسین. یولو گئدرلی – دواملی اولسون.