«قارداشیم هئچ بیر یانلیش ایش گؤرمه‌ییب، بیزبونا اینانیریق قارداشیمین ایناندیغی هر مقصده اینانیریق». تبریز اونیوئرسیته تی‌نین طلبه‌سی سجاد رادمهرین باجی‌سی ایلاهه «آزادلیق» رادیوسونا بئله دئییر.

او، بو موصاحیبه نی وئرنده، قارداشینین نه اوسته حبس اولوندوغونو بئله بیلمیردی. ایندی سجاد رادمهر و یئددی دیگر طلبه‌یه یانوارین 17-ده وئریلن حؤکم آچیقلانیب.

اما حؤکمو اوخویانلار هله ده گنج‌لرین نیه حبس اولوندوغونا قانونی ایضاح تاپمادیق‌لارینی دئییرلر.

وکیل نقی محمودی‌نین سؤزلرینه گؤره، طلبه‌لردن آلتی‌سینا بیر ایل حقیقی، ایکی ایل شرطی حبس جزاسی، اوچونه - داریوش حاتمی، منصور امینیان و مقصود عهدی یه ایسه برات وئریلیب.

وکیلین سؤزلرینه گؤره، یانوارین 17-ده وئریلمیش حؤکم مدافعه‌یه رسمن تقدیم اولونان کیمی، او، سجاد، ائله‌جه ده احسان نجفی نسب، فراز زهتاب، آیدین خواجه ای، امیر مردانی و مجید ماکویی‌نین آدیندان اعتیراض شیکایتی وئره‌جک. چون کی اتهام‌لاری اساس‌سیز ساییر.

طلبه‌لری ایران ایسلام جمهورییتینین علئیهینه تبلیغات آپارماقدا و قانونسوز تشکیلات یاراتماقدا گوناهلاندیریرلار.

بونون ثبوتو کیمی ایسه اونلارین طلبه بلوق یاراتما‌لاری گؤستریلیر. یعنی اینتئرنئتده گونده‌لیک سایت یاراتما‌لاری. ایندی سوال اورتایا چیخیر کی، آلتی نفرین ییغیشیب بیر بلوقو یازماسی قانون‌سوز تشکیلات یاراتماق ساییلیر، یا یوخ؟ نقی محمودی دئییر کی، یوخ.

وکیل حساب ائدیر کی، طلبه‌لرین حبسینه سبب ائله همین بلوق‌لار، داها دوغروسو، اورادا یازیلان‌لاردیر:

«اونلار طلبه‌لرین مسئله‌لری باره‌ده یازی‌لار، تنقیدی مقاله‌لر درج ائدیردیلر»

آما وکیل بونون دا گوناه اولدوغونو ثبوت ائدن بیرجه قانون تاپا بیلمیر کی، محکمه حؤکمونه حاق قازاندیرسین.

 محکمه‌دن فرقلی اولا‌راق، طلبه‌لر آذربایجان دیلینده مکتب‌لرین آچیلماسی ایستک لرینی عکس ائتدیرن مقاله‌لرینده قانونا ایستیناد ائدیب‌لر.

نقی محمودی: «اونلار 30 ایل اول ایراندا یاشایان بوتون خالق‌لارا وئریلمیش آنا دیلینده اوخویوب یازماق، تحصیل آلماق حقوقونون ایشلمه‌سینی ایسته ییرلر».

حقوق مدافعه‌چی‌لری دئییرلر کی، چوخ واقت ایراندا وکیل‌لر میللی حقوق‌لاری طلب ائدن‌لری مدافعه‌یه جسارت ائتمیرلر.

میللی فعال‌لاری مدافعه ائتدیگی اوچون بیر نئچه دفعه حبسه دوشموش صالح کامرانی‌نین آجی تجروبه‌سی، چوخ‌لارینی بو ایشدن چکیندیریب.

وکیل نقی محمودی  ایسه دئییر کی، او، هله جیدی تضییق‌لرله اوزلشمه‌ییب. اما بو جور ایشلری باشقا وکیل‌لر گؤتورمه دیگین‌دن، اونو سونا چاتدیرماغی اؤزونه بورج بیلیر. /آزادلیق رادیوسو.

بو خبر اؤیرنجی طرفیندن کؤچورولموشدور.